KUKI-award 2023 pa Percy Pinedo pa su blog ‘Hòrta Shòrt’

*** KOMUNIKÁDO DI PRENSA ***

Willemstad, 26 di yanüari 2024

‘KUKI-award’ pa e wèpsait mas aktualisá di aña 2023

Djabièrnè pasá (26 di yanüari) a entregá e KUKI-award na Percy Pinedo pa su blog ‘Hòrta Shòrt’ (percypinedo.com). E premio tabata un trofeo trahá di partinan bieu di kòmpiuter diseñá pa Rianne Hellings ku Ace Suares, ku un Micro:bit programá ku, entre otro, ta mustra e temperatura riba komando.

Mas òf ménos 100 persona a sigui e presentashon di Rianne Hellings, trahadó di wèpsait i diseñadó di Kuki+Ko, ku a mustra e wèpsaitnan ku a hasi bon uso di e posibilidatnan digital ‘online’ ofresé durante e aña 2023. A wak mas o ménos binti wèpsait ku a publiká èkstra informashon, a hasi uso di ‘podcasts’ òf a ofresé kurso ‘online’. Tambe a pone énfasis riba algun wèpsait di artistanan i skirbidó riba arte, ku a risibí supsidio di Prins Bernhard Cultuurfonds Caribisch Gebied, manera e wèpsait di Josée Thissen-Rojer (curacaoartconsultancy.com).

Percy Pinedo a gana e premio debí na su blòg ‘Hòrta Shòrt’ pa e kantidat remarkabel di kontenido ku a ser publiká durante e aña 2023, i tambe pa e kantidat enorme di bishitantenan ku su blòg ta haña. Su último post, por ehèmpel, a ser mirá 3500 biaha den 5 dia i a risibí 30 reakshonnan. E blòg ta skirbí na Papiamentu i ta trata tópikonan tokante lugánan históriko, eventonan i anékdota riba Kòrsou. Percy mes a tuma e premio personalmente.

E KUKI-award a ser entregá pa e diesocho biaha. Ganadónan di añanan anterior ta inkluí Creating Milestones, Scouting Antiano, Sociaal-Economische Raad (SER), Fundashon Alton Paas, Carin Cares, 3C Coach Consult, Garnet NV, Hummingbird Feather, KBB, Pelikino, NAAM, KidDocs, Caribbean Filmcom, Motiance Dance School, FAJ + SNAYDP, i Baas Sports.

Kuki+Ko ta traha wèpsait ku ta funshoná bon riba móbil, usando WordPress (softwèr di fuente habrí pa wèpsait). Nos ta wak bèk riba un anochi fantástiko i nos ta gradisí tur hende ku a yuda na realisashon di e diferente proyektonan i wèpsait.